APM၊ စပ်တမ်ဘာ ၁၂/ ၂၀၂၃
မြောက်ကိုရီးယားဂေါင်းဆောင် ကင်ဂျုံအန်းစွာ သမ္မတပူတင်နန့် တွိဖို့ ဒေနိ(စပ်တမ်ဘာ ၁၂ရက်နိ)မာ ရုသျှနိုင်ငံသို့ ရောက်လားကြောင်း သိရပါရေ။
ကင်ဂျုံအန်းစွာ နျူကလီးယားလက်နက်နန့် ခဲယမ်းမီးကျောက်စက်ရုံတိကို ဦးဆောင်ကိုင်တွယ်နီရေ မြောက်ကိုရီးယား ထိပ်တန်းစစ်ဖက်အရာဟိတိနန့်တတူ စပ်တမ်ဘာ ၁၀ ရက်နိမွန်းလွဲပိုင်းမာ မြို့တော်ပြုံယမ်းက ကိုယ်ပိုင်ရထားနန့် ရုသျှသို့ ထွက်လားရောက်ခစွာဖြစ်ပါရေ။
ခရီးစဉ်အတွင်း ကင်ဂျုံအန်းရေ ရုသျှ-ယူကရိန်းစစ်ပွဲမာ ရုသျှကိုလက်နက်ထောက်ပံ့ပီးဖို့ သဘောတူညီချက်နန့် ပတ်သက် လို့ အနောက်နိုင်ငံတိ စိုးရိမ်မှုဖြစ်နီရေအတိုင်း ရုသျှသမ္မတပူတင်နန့် တွိဆုံမှုတခုလုပ်ဖို့ မျှော်လင့်ရပါရေ။
ရုသျှအစိုးရ၏ အတိုချုံးထုတ်ပြန်ချက်တခုအရ အဆိုပါခရီးစဉ်ရေ သမ္မတ ပူတင်၏ ဖိတ်ကြားချက်အရဖြစ်ပြီးကေ နှစ်နိုင်ငံဂေါင်းဆောင်တိစွာ ဒေရက်ပိုင်းအတွင်း တွိဆုံဆွေးနွေးဖို့လို့ သိရပါရေ။
တွိဆုံဆွေးနွေးမှုကို ဇာအချိန်နန့် ဇာနီရာမာ လုပ်ဖို့ဆိုစွာကို နှစ်နိုင်ငံစလုံးက ထုတ်ဖော်ပြောကြားခြင်းမဟိဘဲ ဆွေးနွေးမှုကို ပူတင်နန့် ကင်ဂျုံအန်းရို့က ဦးဆောင်ပနာ လိုအပ်ကေ တဦးချင်းတွိဆုံနိုင်ရေလို့ ရုသျှအစိုးရပြောခွင့်ရ ဒီမီထရီ ပက်စကော့ဗ်က
ဆိုပါရေ။
အဆိုပါဆွေးနွေးပွဲစွာ နှစ်နိုင်ငံဆက်ဆံရီးကို အဓိကထားလုပ်ဆောင်ဖို့အတွက်ဖြစ်ပြီးကေ အိမ်နီးချင်းတိုင်းပြည်အချင်းချင်း အပြန်အလှန် အကျိုးဟိရေ ဆက်ဆံရီးကို တည်ဆောက်ဖို့ အရေးကြီးရေလို့ ပက်စကော့ဗ်က ဆက်လို့ ပြောကြားခပါရေ။
ဆွေးနွေးမှုလုပ်ဖို့ ဖြစ်နိုင်ခြေဟိရေ နီရာကတော့ ရုသျှအရှိပိုင်းဟိ ဗလာဒီဗော့စတော့မြို့ဖြစ်တေလို့ ရုသျှသတင်းဌာန TASS က ဖော်ပြထားပြီးကေ ပြုံးယမ်း၏ မြောက်ဖက် ၄၂၅ မိုင်အကွာမာဟိရေ ယင်းမြို့စွာ ၂၀၁၉ ခုနှစ်ကလည်း ပူတင်နန့် ကင်ဂျုံအန်း ပထမဆုံးတွိခရေ နီရာဖြစ်ပါရေ။
ဒေခရီးစဉ်ရေ ကိုဗစ်စဖြစ်တေလောက်ကပင် နယ်စပ်ထိန်းချုပ်မှုကို သုံးနှစ်ကျော်ကြာ တင်းတင်းကျပ်ကျပ်ပိတ်ထားခရေ မြောက်ကိုရီးယားဂေါင်းဆောင် ကင်ဂျုံအန်းအတွက် ပထမဆုံး နိုင်ငံခြားခရီးစဉ် ဖြစ်ပါရေ။
Source – North Korean leader Kim Jong Un arrives in Russia before an expected meeting with Putin
Photo – KCNA
