APM၊ စပ်တမ်ဘာ ၁၂ /၂၀၂၃
မြန်မာစစ်တပ်၏ ရက်ရက်စက်စက် ရိုက်နှက်စစ်ဆီးမှုကြောင့် ဘယ်ဖက်ညှပ်ရိုး အက်ကွဲလားရေ မင်းပြားက ကိုညီညီအောင် လက်ဟိအချိန်အထိ ဆီးကုသခွင့်မရသိမ့် ကြောင်းသိရပါရေ။
ကိုညီညီအောင် (၃၆ နှစ်)ကို ကုန်ခရေ ၂၀၂၂ ခုနစ် စပ်တမ်ဘာ ၁၈ ရက်နိက မင်းပြားအခြီစိုက် မြန်မာစစ်တပ် ခမရ (၃၇၉) တပ်ရင်းက ဖမ်းယူလားခပါရေ။
ယင်းနောက် ကိုညီညီအောင်ကို စစ်ကြောရီးမှာ တလကျော်လောက် ထိန်းသိမ်းထားခပနာ ခမရ (၅၄၁) တပ်ရင်းက ဗိုလ်ကြီး ဌေးအောင် တရားလိုလုပ်ပျာ ပုဒ်မ ၁၇ (၁) နန့် မင်းပြားမြို့နယ်တရားရုံးမှာ တရားစွဲဆိုထားစွာဖြစ်ပါရေ။
ကိုညီညီအောင်စွာ စစ်ကြောရီးကာလအတွင်း ရိုက်နှက်မိန်းမြန်းစစ်ဆီးမှုဒဏ်တိကြောင့် ဘယ်ဖက်ညှပ်ရိုးစွာ အက်ကွဲလားပနာ နာကျင်ကိုက်ခဲရေဝေဒနာကို ခံစားနီရပြီးကေ၊ အသက်ယှူကျပ်ကာ အာရုံကြောအားနည်းရေ ရောဂါကိုပါ ခံစားနီရလို့ လက်ဟိမှာ အရေးပေါ်ဆီးကုသခွင့်ရဖို့ မိသားစုဝင်တိ လိုလားနီကတ်ပါရေ။
လက်ဟိမှာ ကိုညီညီအောင်ကို မင်းပြားမြို့မရဲစခန်းမှာ ထိန်းသိမ်းထားပြီးကေ ကုန်ခရေ စပ်တမ်ဘာ ၅ ရက်နိက ရုံးထုတ်ခကေလေ့ တရားသူကြီး ဦးမြတ်မင်းဟန် က စစ်ဆီးမှုတစုံတရာမပြုလုပ်ခဘဲ လာဖို့စပ်တမ်ဘာ ၁၉ ရက်နိကို ရုံးချိန်းရွှိဆိုင်းထားကြောင်း သိရပါရေ။
