APM ၊ ဂျူလိုင် ၁၂/ ၂၀၂၃
မုန်တိုင်းကြောင်း လယ်ယာအများအပြား ဆားငန်ရီဝင်ရောက်ကာ ပျက်စီးခရသည့် မုန်တိုင်းသင့် ရက္ခိုင်တောင်သူများမှာ လက်တလော၌ မြီဆီမြီသြဇာများ အရေးတကြီးလိုအပ်နီကြောင်း သိရသည်။
ရက္ခိုင်တွင် ကုန်ခသည့် မေ ၁၄ ရက်နိက Mocha ဆိုက်ကလုန်းမုန်တိုင်းပြင်းပြင်းထန် ထန်တိုက်ခတ်ခပြီးနောက် မုန်တိုင်း သင့် မြို့နယ်များဟိတောင်သူလယ်သမားများမှာ သိမ်းဆည်းထားသည့် မျိုးစပါးများ အားလုံးပျက်စီးဆုံးယှုံးခရသည့်အပြင် လယ်ယာမြီများလေ့ ဆားငန်ရီဝင်လားခရသည်။
လက်ဟိအဆိုပါ လယ်သမားများမှာ မဟိ၊ဟိကြောင်းပြု၍ လယ်ယာလုပ်ငန်းကို ကုပ်ကပ်လုပ်ကိုင်နီကတ်ရပြီး ငွေကြေး အခက်အခဲများနန့် ရင်ဆိုင်ကတ်ရကာ လိုအပ်သည့် မြီဆီမြီသြဇာများဝယ်ယူနိုင်ရန် မတတ်နိုင်ဖြစ်နီကတ်ရကြောင်း လယ်သမားများက ပြောသည်။
ယင်းအပြင် ယင်တောင်သူလယ်သမားအများစုမှာ မြီဆီမြီသြဇာဈီးမြင့်တက်ခြင်းများကြောင့်လေ့ ပို၍အခက်ကြုံနီကတ် ရပြီး တခြားလိုအပ်ချက်များဖြစ်သည့် မျိုးစပါးများကို လာရောက်ထောက်ပံ့သည်များဟိကေလေ့ မြီဆီမြီသြဇာ ထောက်ပံ့ခြင်းတော့ မဟိသိမ့်ဟုဆိုသည်။
ရက္ခိုင်တွင် လယ်မြီဧကပေါင်း ၁၂ သိန်းကျော်ဟိပြီး ၂၀၂၂ ခုနှစ်တွင် ဧက ၉ သိန်းလောက်ရာ စိုက်ပျိုးနိုင်ခကာ ဒေနှစ်မှာ လေ့ မုန်တိုင်းကြောင့် လယ်မြီများပျက်စီးခြင်း၊ သွင်းအားစုစရိတ်ကြီးမားခြင်းနန့် လုပ်သားအင်အားယှားပါးခြင်းများ ကြောင့် စိုက်ပျိုးမြီဧက ထပ်မံလျှော့ကျနိုင်ကြောင်း တောင်သူလယ်သမားအရေးဆောင်ရွက်နီသူများက ခန့်မှန်း သုံးသပ် ကတ်သည်။
