APM ၊ ဂျူလိုင် ၁၂ / ၂၀၂၃
သွီးလွန်တုပ်ကွေးရောဂါကြောင့် တောင်ကုတ်မြို့နယ်က အသက် ၁၃ နှစ်အရွယ်အချေတယောက်သီဆုံးခရပြီးနောက် ရက္ခိုင်တွင် ဒေလအတွင်း သွီးလွန်တုပ်ကွေးဖြစ်၍ သီဆုံးသူ ၃ ယောက်အထိ ဟိလာသည်။
သီဆုံးခသူများမှာ တောင်ကုတ်မြို့နယ်က တယောက်၊ မြေပုံမြို့နယ်က တယောက်နန့် ပေါက်တောမြို့နယ်က တယောက်ဖြစ်ပြီး ၃ ယောက်လုံးသည် အသက် ၁၅ နှစ်အောက် အချေသူငယ်များဖြစ်ကတ်သည်။
တောင်ကုတ်မြို့နယ်က သီဆုံးခသူမှာ ဖောင်းခါးကျေးရွာမှ ဦးနေမင်းလှိုင်နန့် ဒေါ်ရီရီစိုးရို့၏သား မောင်စိုးဇေယျာဖြိုးဖြစ်ပြီး သူသည် သွီးလွန်တုပ်ကွေး ရောဂါဖြင့် ရန်ကုန်ဆီးရုံကြီးတွင် ဆီးကုသမှုခံယူနီစဉ် ဂျူလိုင် ၁၀ ရက်နိက သီဆုံးလားခြင်းဖြစ် သည်။
ပြီးခသည့် ဂျူလိုင် ၈ ရက်နိကလေ့ မြေပုံမြို့နယ်၊ ညောင်တောကျေးရွာမှ အသက် ၅ နှစ်အရွယ် မမေသဇင်ဖြိုးသည် သွီးလွန်တုပ်ကွေး ရောဂါဖြင့် ပေါက်တောဆီးရုံတွင် သီဆုံးလားခရသည်။
ယင်းအပြင် ဂျူလိုင်လပထမအပတ်အစပိုင်းကလေ့ ပေါက်တောမြို့နယ်မှ အချေတယောက် သွီးလွန်တုပ်ကွေးရောဂါဖြစ်၍ ပုဏ္ဏားကျွန်းဆီးရုံတွင် သီဆုံးလာခရသိမ့်သည်။
ရက္ခိုင်တွင် မုန်းတိုင်း တိုက်ခတ်ပြီးနောက်ပိုင်းမှစ၍ သွီးလွန်တုပ်ကွေး ရောဂါဖြစ်ပွားမှုနှုန်းသိသိသာသာ များပြားလျက် ဟိရာ ကုန်ခသည့် ဂျုန်လတလတည်းမှာပင် သွီးလွန်တုတ်ကွေးဖြစ်ပွားသူ ၃၀၀ ကျော်ဟိခကြောင်းသိရသည်။
သွီးလွန်တုပ်ကွေး ရောဂါလက္ခဏာများမှာ အဖျားကြီးခြင်း၊ ပြင်းထန်စွာခေါင်းကိုက်ခြင်း၊ ကြွက်သားနန့် အဆစ်အမြစ် ကိုက်ခြင်း၊မျက်လုံးနာခြင်း၊ ဝမ်းနာ၊ဝမ်းအောင့်ခြင်း၊ ပျိုအန်ခြင်းနန့် ခန္ဓာကိုယ်အနှံ့ အနီကွက်များပေါ်ခြင်း စသည့် ရောဂါလက္ခဏာများပြသကြောင်းသိရသည်။
သွီးလွန်တုပ်ကွေးရောဂါသည် ခြင်ကျားကိုက်ခံရခြင်းမှ တဆင့်ဖြစ်ပွားတတ်ခြင်းဖြစ်ပြီး ပြင်းထန်ပါက အသက်သီ ဆုံးသည်အထိဖြစ်ပွားနိုင်၍ ရောဂါဖြစ်ပွားလာပါက ဆီးရုံ၊ ဆီးခန်းများသို့ အယင်ဆုံးလားရောက် ကုသကတ်ရန် ကျန်းမာရီးဌာနက အသိပီးပြောကြားထားသည်။
