APM ၊ ဧပြီ ၁၂ /၂၀၂၄
ဘူးသီးတောင်မြို့နယ်မာ ဧပြီ ၁၁ ရက်နိ၊ ညဇာက ARSA အကြမ်းဖက်အဖွဲ့ သတ်ဖြတ်ခလို့ မူဆလင် အမျိုးသားတယောက် သီဆုံးလားကေလို့ သိရပါရေ။
သီဆုံးလားခစွာ ဘူးသီးတောင်မြို့နယ်၊ ကန်ကြီးပြင်( မူဆလင်)ရွာ အာဂျေးတူရာမာန် (၃၀ နှစ်) ဖြစ်ပါရေ။
ဧပြီ ၁၁ ရက်နိ ညဇာ ၅ နာရီအချိန်လောက်က ဘဂုံးနားမြောက်ရွာမာ အခြီပြုနီထိုင်လျက်ဟိရေ ARSA အကြမ်းဖက်အဖွဲ့စွာ ကန်ကြီးပြင်(မူဆလင်)ရွာက အာဂျေးတူရာမာန်ကို အကြောင်းမဲ့ ဖမ်းဆီးပနာ သတ်ဖြတ်ခစွာလို့ ဒေသခံတိက ပြောပါရေ။
ကုန်ခရေ မာ့ချ် ၆ ရက်နိကလည်း ARSA အကြမ်းဖက်အဖွဲ့ လူမဆန်စွာ ရက်ရက်စက်စက် သတ်ဖြတ်ခလို့ ဘူးသီးတောင်မြို့နယ်၊ စိမ်းညှင်းပြားဈီးက မူဆလင် အမျိုးသားတယောက် သီဆုံးခပါသိမ့်ရေ။
ARSA အကြမ်းဖက်အဖွဲ့စွာ ဘူးသီးတောင်-မောင်တောအတွင်းမာနီထိုင်ရေအရပ်သားပြည်သူတိအပေါ် အလားတူ ဖမ်းဆီး၊ ငွေညှစ်၊ ဒါးမြတိုက်၊ လူသတ်၊ ပြန်ပီးဆွဲ၊ ခိုးဆိုးလုယက်မှုပေါင်း မြောက်မြားစွာကို လက်ရဲဇက်ရဲ ဗြောင်ကျကျ ကျူးလွန်လျက်ဟိကြောင်းလည်း သိရပါရေ။
