APM ၊ ဧပြီ ၁၂ / ၂၀၂၄
ဂွမြို့နယ်၊ ကျိန္တလီမာ အကြမ်းဖက်စစ်ကောင်စီစွာ ဧပြီ ၁၁ ရက်နိ ညည့်က အဖဖြစ်သူ ဦးသိန်းဇံကို ရှာမတွိလို့ အဖမ်းခံထားရရေ သားဖြစ်သူ ကိုနေဇာလင်းကို အဂုခါ ဂွမြို့သို့ ယူလားရေလို့ သိရပါရေ။
အကြမ်းဖက် စစ်ကောင်စီက ဂွမြို့နယ်၊ ကျိန္တလီမြို့၊ သဲကုန်းရွာက ဦးသိန်းဇံကို ရှာမတွိလို့ဆိုပနာ သူ၏သားဖြစ်သူ ကိုနေဇာလင်းနန့် ယင်းအိမ်မာထိုင်နီကတ်တေ ကိုဝင်းမင်းထွဋ်၊ ကိုညီလေးငယ်ရို့ကို ကနဦး ဖမ်းယူလားခပြီးကေ ကျိန္တလီရဲစခန်းအတွင်း ထိန်းသိမ်းချုပ်နှောင်ထားခပါရေ။
ယင်းနောက် ဒေနိ ဧပြီ ၁၂ရက်နိ၊ နိခင်း ၁၂နာရီခွဲလောက်မာတော့ ဖမ်းဆီးထိန်းသိမ်းထားရေ ယင်းသုံးယောက်ထဲက ကိုဝင်းမင်းထွဋ်နန့်ကိုညီလေးငယ်ရို့ကို ပြန်လွှတ်ပီးလိုက်ပြီးကေ ဦးသိန်းဇံ၏ သားဖြစ်သူ ကိုနေဇာလင်းကိုတော့ ဂွမြို့သို့ ဖမ်းဆီးခေါ်ယူလားခရေလို့ သိရပါရေ။
ရက္ခိုင့်ပြည်မာ အာရက္ခတပ်တော်(AA)နန့် အကြမ်းဖက်စစ်ကောင်စီတပ်ရို့ တကျော့ပြန်ကာလအတွင်း အကြမ်းဖက် စစ်ကောင်စီစွာ အပြစ်မဲ့အရပ်သားပြည်သူတိကို အကြောင်းအမျိုးမျိုးပြပနာ မတရား ဖမ်းဆီး၊ ရိုက်နှက်၊သတ်ဖြတ်မှုတိ စဉ်ဆက်မပြတ် ပြုလုပ်လို့ ဟိနီရေ။
