APM ၊ ဧပြီ ၁၂ / ၂၀၂၃
ရက္ခိုင်ဓလိထုံးတမ်းစဉ်လာအရ မြောက်ဦးဟိ အရပ်ဖက်အဖွဲ့အစည်း ၁၆ ခု စုပေါင်း၍ မြောက်ဦးမြို့တည် ဘုရားဖြစ်သည့် လေးမျက်နှာပုထိုးတော်ကြီးတွင် ဒေနိ(ဧပြီ ၁၂ ရက်နိ)မိုးထက ဘုရားရီသပ္ပာယ် (ဘုရားရီချိုး) ခကတ်ကြောင်း သိရသည်။
ဘုရားရီသပ္ပာယ်ခြင်းကို အရပ်ဖက်အဖွဲ့အစည်း ၁၆ ခုမှ လူပေါင်း ၂၀၀ ကျော်ပါဝင်ဆင်နွဲခကတ်ကာ လေးမျက်နှာ ပုထိုးတော်ကြီးအတွင်းဟိ ဆင်းတုတော် ၁၀ ဆူနန့် အရံဆင်းတုတော် ၄ ဆူကို ဘုရားရီသပ္ပာယ်ခတ်ကတ်သည်။
ဘုရားသပ္ပာယ်သည့်အဖွဲ့များသည် ဒေနိမိုးထ ၁၀ နာရီခန့်က မြောက်ဦးမြို့ လက်ကောက်ဈီးရပ်ကွက်တွင် စုဝေးပြီး လေးမျက်နှာပုထိုးတော်ကြီးသို့ လားရောက်သပ္ပာယ်ပူဇော်ခကတ်ခြင်းဖြစ်ကာ ဒေနိမိုးထ ၁၁ နာရီတွင် ရီသပ္ပာယ် ပူဇော်ပြီးစီးခသည်ဟု ဆိုသည်။
လေးမျက်နှာပုထိုးတော်ကြီးကို အေဒီ ၁၄၃ဝ ခု တွင် မြောက်ဦးမြို့တည် ဘုရားအဖြစ် ရခိုင်ဘုရင် မင်းစောမွန်က တည်ထားခခြင်းဖြစ်ကြောင်း သိရသည်။
