APM ၊ မာ့ချ် ၁၂/ ၂၀၂၄
အကြမ်းဖက် ဖက်ဆစ် စစ်ကောင်စီစွာ မကြာခင် လက်လွှတ်ရဖို့ဟိနီရေ ကျောက်ဖြူ မြို့နယ်က စီမံကိန်းကို နှစ်လအတွင်း အကောင်ထည်ဖော်ဖို့လို့ မာ့ချ် ၁၁ ရက်နိမာ စစ်ကောင်စီ၏ ဒုတိယ စစ်ဂေါင်းဆောင် စိုးဝင်းက အရှက်ပြေ ပြောကြားလိုက်ပါရေ။
အကြမ်းဖက် ဖက်ဆစ် စစ်ကောင်စီ၏ ဒုစစ်ဂေါင်းဆောင် စိုးဝင်းနန့် မြန်မာအထူးစီးပွားရီးဇုန်ဆိုင်ရာ ဗဟိုအဖွဲ့၏ ဒုတိယအကြိမ် အစည်းအဝေးမာ ကျောက်ဖြူရီနက် ဆိပ်ကမ်းစီမံကိန်းနန့် ပတ်သက်လို့ အဂုပိုင် မရှက်မဟိ ပြောကြားခစွာ ဖြစ်ပါရေ။
” ကျောက်ဖြူ အထူးစီးပွားရီးဇုန်စွာ ပထဝီနိုင်ငံရီးအရသော်လည်းကောင်း၊ စီးပွားရီး နိုင်ငံရီးအရ အရေးကြီးပြီး ဒေသခံတိ နန့် မြန်မာပြည်အတွက် အကျိုးများစွာ ဖြစ်ထွန်းနိုင်ရေအတွက် အောင်မြင်အောင် အကောင်အထည်ဖော် ဆောင်ရွက်လားဖို့ လိုအပ်တေ” လို့ သူက အလိစီ ပြောကြားခစွာပါ။
ယင်းအပြင် ပထဝီနိုင်ငံရီးအရ နိုင်ငံအတွင်း အထူးစီးပွားရီးဇုန်တိကို အကောင်အထည် ဖော်ရာမာလည်း စီးပွားရီးရှုထောင့်တခုတည်းရာ မကြည့်ဘဲ နိုင်ငံရီးအနီနန့် ထည့်သွင်းစဉ်းစားဖို့ လိုအပ်ကြောင်း၊ ကျောက်ဖြူအထူးစီးပွားရီးဇုန်မာလည်း ပို့ကုန်တိုးမြင့်ရီးအတွက် ပို့ကုန်တိကို ဦးစားပီးထုတ်လုပ်ဖို့ လုပ်ငန်းသျှင်တိကို ရွီးချယ်ဖိတ်ခေါ်လားဖို့လည်း မရှက်မကြောက် ပြောဆိုလားခပါသိမ့်ရေ။
အထူးစီးပွားရီးဇုန် ရီနက်ဆိပ်ကမ်းစီမံကိန်း အကောင်အထည်ဖော်ဆောင်ရွက်နိုင်ရီးအတွက် လုပ်ငန်းလုပ်ကိုင်ခွင့် သဘောတူစာချုပ်ကို ၂၀၂၀ ခုနှစ်၊နိုဗမ်ဘာ ၅ ရက်နိမာ ကနဦး ချုပ်ဆိုခပြီးကေ ယင်းသဘောတူစာချုပ်ကို ဖြည့်စွက်တေ နောက်ဆက်တွဲစာချုပ်ကိုလည်း ၂၀၂၃ခုနှစ်၊ ဒီဇမ်ဘာ ၂၆ ရက်နိက နီပြည်တော်မာ စီမံကိန်းကုမ္ပဏီနန့် ကျောက်ဖြူ အထူးစီးပွားရီးဇုန် စီမံခန့်ခွဲမှုကော်မတီရို့ လက်မှတ် ရွီးထိုးခပြီး Long Stop Date ကို သက်တမ်း တိုးပီးခစွာ ဖြစ်ပါရေ။
ယင်းသက်တမ်းတိုးမြှင့်ထားရေ ကာလစွာ ၂၀၂၅ ခုနှစ်၊ ဂျုန်လ ၂၅ ရက်နိမာ ပြည့်မြောက်ဖို့ ဖြစ်တေအတွက် သတ်မှတ်ကာလ မတိုင်မီ နှစ်လအလိုမာ နှစ်ဦးနှစ် ဖက်လုပ်ငန်းတိ ပြီးပြတ်အောင် မဖြစ်မနီ ဆောင်ရွက်ရဖို့ ကိစ္စဖြစ်လို့ လုပ်ငန်းကော်မတီရို့က ဆက်လက်ဆောင်ရွက်လို့ ဟိပြီးကေ အခြားပါဝင်ရေ ကော်မတီတိကလည်း လုပ်ငန်းအယင်ဆုံးပြီးမြောက်အောင် ကန့်သတ်ချက်တိကြား ဝိုင်းဝန် ဆောင်ရွက်ပီးဖို့ လိုအပ်တေလို့လည်း အာသာဖြေ ပြောဆိုပါရေ။
ကျောက်ဖြူစီမံကိန်းစွာ တရုတ်အစိုးရ ၏ စီးပွားရီးမဟာဗျူဟာစီမံကိန်းတခုဖြစ်တေ Belt and Road Initative(BRI) ဂေါင်းစဉ်အောက်မာဟိပြီး အမေရိကန် ဒေါ်လာ ၇ ဘီလီယံကျော် တန်ဖိုးဟိပြီးကေ အရေးပါးရေ စီမံကိန်းတခုဖြစ်တေလို့လည်း သိဟိရပါရေ။
Photo – CJ
