APM၊ ဒီဇမ်ဘာ ၁၂/၂၀၂၃
မြောက်ဦးမြို့ဟိ စစ်ကောင်စီတပ်ရင်းတိက ဒေနိ ဒီဇမ်ဘာ ၁၂ ရက်နိ၊ နိခင်းပိုင်းမာ ရပ်ရွာတိသို့ လက်နက်ကြီးတိနန့် ရည်ရွယ်ချက်ဟိဟိ ပစ်ခတ်နီရေလို့ သိရပါရေ။
ဒေနိ နိခင်း ၁၁ နာရီ၊ ၄၁ မိနစ်ကစလို့ လက်ဟိအချိန်အထိ မြောက်ဦးအခြီစိုက် စစ်ကောင်စီတပ်ရင်တိဖြစ်ကတ်တေ ခမရ( ၃၇၇ ) နန့် ခမရ ( ၅၄၀) တပ်ရင်းတိကနီ စစ်ရီးနန့် လုံးဝမသက်ဆိုင်ရေ ရပ်ရွာတိကို လက်နက်ကြီးတိ ဆက်တိုက်ပစ်နီ ခပါရေ။
ယင်းလက်နက်ကြီးကျည်တိအနက် တချို့စွာ မြောက်ဦး မြို့နယ် ပိုးဖြူကျွန်း၊ ပရိန်၊ရှောက်ပုံကျွန်းအစဟိရေ ရပ် ရွာအနားတိသို့ ၁၀ လုံးလောက် ကျရောက်ပေါက်ကွဲခပါရေ။
ရက္ခိုင်ပြည်မာ စစ်ကောင်စီစွာ ဒေနိ ဒီဇမ်ဘာ ၁၂ ရက်နိ မိုးထကစလို့ မြောက်ဦးအပါအဝင် မင်းပြား၊မြေပုံ၊ အမ်း၊ ပုဏ္ဏားကျွန်း၊ ရသေ့တောင်၊ ဘူးသီးတောင်၊ မောင်တောမြို့နယ်တိဟိ အများပြည်သူနီထိုင်ရာ မြို့၊ ရွာတိသို့လက် နက်ကြီး လက်နက်ချေတိနန့်ပစ်ခတ်ခြင်း၊ ရီကြောင်း၊ လီကြောင်းတိုက်ခိုက်ခြင်းတိကို အယင်ရက်တိကထက် ပိုလို့ ပြင်းပြင်းထန်ထန် လုပ်ဆောင်လာစွာကို တွိလာရပါရေ။
