APM ၊ ဂျန်နဝါရီ ၁၂ / ၂၀၂၄
ကျောက်တော်မြို့နယ်မာ ဂျန်နဝါရီ ၁၂ ရက်နိ၊ နိခင်း ၁ နာရီလောက်က ကျောက်တော်အခြီစိုက် စစ်ကောင်စီတပ် ခမရ(၃၇၆) တပ်ရင်းအနားက ဖြတ်လားချိန် မိုင်းနင်းမိလို့ ပေါက်ကွဲမှုဖြစ်ပြီးကေ အရပ်သားပြည်သူတယောက် ခြီတဖက် ပြတ်ထွက် လားကြောင်း သတင်းရဟိပါရေ။
ခြီတဖက်ပြတ်ထွက်လားရေလူစွာ ကျောက်တော်မြို့နယ်၊ အလယ်ကျွန်းအုပ်စု၊ ဈီးဝ(မူဆလင်)ရွာက အာမီတူဆောင်း(၂၈ နှစ်) ဖြစ်ပါရေ။
အာမီတူဆောင်းစွာ ဂျန်နဝါရီ ၁၂ ရက်နိ၊ နိခင်း ၁ နာရီလောက်က ကျောက်တော်မြို့နယ်၊ ဒေါင်းတောင်ယိုးရွာဖက်သို့ နွားဝယ်ဖို့အလား ခမရ(၃၇၆)တပ်ရင်းနားက လယ်ကွင်းပြင်မာ မိုင်းနင်းမိခစွာလို့ ရွာသားတိက ပြောပါရေ။
ယင်းမိုင်းပေါက်ကွဲမှုကြောင့် အာမီတူဆောင်း၏ ဘယ်ဖက်ခြီထောက်၊ ခြီသလုံးနားက ပြတ်ထွက်လားပြီးကေ ညာဖက်ခြီထောက်မာလည်း ဒဏ်ရာ ပြင်းပြင်းထန်ထန် ရလားပနာ ဆီးရုံသို့ အရေးပေါ်ပို့ဆောင်လိုက်ရရေလို့ ဆိုပါရေ။
ကျောက်တော်အပါအဝင် ရက္ခိုင်ပြည်မြို့နယ်တိမာ စစ်ကျန်လက်နက်တိ၊ မြီမြှုပ်မိုင်းပေါက်ကွဲမှုတိ မကြာမကြာ ဖြစ်ပွားလို့ ဟိနီပြီးကေ ပေါက်ကွဲမှုအများစုစွာ စစ်ကောင်စီတပ်ရင်း၊ တပ်ဖွဲ့တိနန့်နီးစပ်တေ နီရာတိ၊ စစ်ကောင်စီတပ်စွဲနီထိုင်ခရေနီရာ တိမာ ဖြစ်ပွားနီစွာလည်း ဖြစ်ပါရေ။
