APM ၊ ဂျန်နဝါရီ ၁၂ / ၂၀၂၄
ဂျန်နဝါရီ ၁၂ ရက်နိ၊ နိခင်းမာ စစ်ကောင်စီနေဗီက လက်နက်ကြီးနန့်ပစ်လို့ မင်းပြားမြို့နယ်က အာရက္ခပြည်သူ တယောက် ဂွင်ချင်း သီဆုံးလားကြောင်းသိရပါရေ။
သီဆုံးလားလူမာ မင်းပြားမြို့နယ်၊ ကြောင်ရှည်ချောင်းရွာက ဦးထွန်းအေးလှိုင်(၃၇ နှစ်) ဖြစ်ပါရေ။
ဂျန်နဝါရီ ၁၂ ရက်နိ၊ နိခင်း ၁၂ နာရီ ၃၀ မိနစ်လောက်မာ ကြပ်စင်မြစ်ကြောင်းအတိုင်း ပေါက်တောဖက်ကို လားခရေ စစ်ကောင်စီနေဗီ ၂ စီးစွာ မြစ်ကြောင်းတလျှောက်ဟိ ရပ်ရွာတိကို ရည်ရွယ်ချက်ဟိဟိနန့် လက်နက်ကြီး အလုံး ၁၀ ကျော်လောက်ယမ်းကားပစ်ခတ်ခကြောင်း ဒေသခံရွာသားတိကပြောပါရေ။
ယင်းအထဲက လက်နက်ကြီးကျည်တလုံးစွာ မင်းပြားမြို့နယ်၊ ကြောင်ရှည်ချောင်းရွာဟိ ဦးထွန်းအေးလှိုင်အိမ်နားမာ ကျရောက်ပေါက်ကွဲခလို့ ဦးထွန်းအေးလှိုင်၏ ဦးဂေါင်းမာ လက်နက်ကြီးအစဝင်လားပနာ နီရာမာပင် ဂွင်ချင်း သီဆုံးလားရေလို့ ဆိုပါရေ။
ကုန်ခရေ ဂျန်နဝါရီ ၁၁ ရက်နိကလည်း စစ်ကောင်စီ နေဗီကတပ်ဖွဲ့ဝင် ၁၀ ကျော်စွာ မင်းပြားမြို့၊ မင်းဘာကြီးရပ်ကွက်သို့ တက်လာပြီးကေ အိမ်မာ ပုန်းနီရေ အာရက္ခပြည်သူ ၄ ယောက်ကို လူမဆန်စွာ သီနတ်နန့်ပစ်သတ်ခပါသိမ့်ရေ။
