APM၊ နိုဗမ်ဘာ ၄/၂၀၂၂
ဒေနိ(နိုဗမ်ဘာ ၄ ရက်နိ) မိုးထ ၉ နာရီခန့်မှစ၍ ကျောက်တော်အခြီစိုက် စစ်ကောင်စီတပ်ရင်းများ၊ ဇက်သင်္ဘောများမှ လူနီရပ်ရွာများသို့ လက်နက်ကြီးများဖြင့် အဆက်မပြတ် ပစ်ခတ်တိုက်ခိုက်နီသည့် အတွက် လက်နက်ကြီးကျည် ကျရောက်ပေါက်ကွဲပြီး အပြစ်မဲ့အရပ်သားပြည်သူ ၁၁ ယောက်ထက်မနည်း ထိခိုက်ဒဏ်ရာရဟိထားသည် ဟု သတင်းရဟိသည်။
ဒဏ်ရာရလားသူများမှာ ကျောက်တော်မြို့နယ်၊ ရွှေပြည်ရွာသစ်မှ ဦးမောင်သူငယ်(၈၆နှစ်)၊ ဦးမောင်မောင်ဦး(၂၆နှစ်) ဒေါ်မိုးမိုးယီ(၂၃နှစ်)၊ ဒေါ်ဦးမြစော(၂၂ နှစ်)၊ မောင်အောင်မင်းနိုင်(၈နှစ်)၊ မြင်းကတ်ရွာမှ ဦးကျောင်လှိုင်(၅၁နှစ်)၊ ဒေါ်သိန်းသိန်းယဉ်(၂၈နှစ်)၊ လက်ဆောင်ကောက်(မူဆလင်)ရွာမှ ကိုဆွေတာမောက်(၂၅နှစ်)၊ မောင် မာမတ်နု(၁၀နှစ်) နန့် အုန်းပတီး(မူဆလင်ရွာ)မှ ဦးတာဂျူ(၃၀နှစ်)၊ ဒေါ်နော်ရော်ဇော်မာ(၄၆နှစ်)ရို့ဖြစ်ကတ်သည်။
ကျောက်တော်အခြီစိုက် စစ်ကောင်စီတပ်ရင်း၊ တပ် ဖွဲ့များဖြစ်သည့် စကခ (၉)၊ ခမရ (၃၇၄)၊ ခမရ (၅၃၉)၊ အမတ(၃၇၇) စသည့်တပ်ရင်းများနန့် စစ်ကောင်စီဇက်သင်္ဘော နှစ်စီးမှ အနီးအနားကျေးရွာများသို့ လက်နက်ကြီးများဖြင့်အဆက်မပြတ် ပစ် ခတ်နီ ခြင်းဖြစ်သည်။
ယင်းလက်နက်ကြီးကျည်သည့် ရွှေပြည်ရွာသစ်ဟိ ဦးမောင်သူငယ်၏ နီအိမ်ထဲသို့ကျရောက်ပေါက်ကွဲခကာ ဦးမောင်သူငယ်၏ ဦးဂေါင်းနန့် မြီးဖြစ်သူ ဦးမောင်မောင်ဦး၏ ပေါင်းရင်းရို့တွင် ဒဏ်ရာရလားသည့်ပြင် အိမ်ဘေးနားဟိ ဒေါ်မိုးမိုးယီတွင် လေ့ ညာဖက်ခြီမျက်စီ၌ ဒဏ်ရာရလားကာ ဦးမောင်သူငယ်ကတော့ ဒဏ်ရာပြင်းထန်သည့်အတွက် အသက် အန္တရာယ်စိုးရိမ်ရသည်။
ယင်းအပြင် ယင်းရွှေပြည်ရွာသစ်နီ ဒေါ်ဦးမြစော၏ နီအိမ်ခြံဝင်းသို့လေ့ လက်နက်ကြီးကျည်တလုံးကျရောက်ပေါက်ကွဲခပြီး ဒေါ်ဦးမြစော ၏ ဘယ်ဖက်ခါးဆစ်၌ ဒဏ်ရာရလားသည့်အပြင် အိမ်ဘေးချင်းကပ်ရပ်မှ မောင်အောင်မင်းနိုင်ဘားသို့လေ့ လက် နက်ကြီး ကျည်စ ကျလား၍ ဂေါင်း၌ ဒဏ်ရာပြင်း ပြင်းထန်ထန်ရလားကာ အသက်အန္တရာယ်စိုးရိမ်ရကြောင်း သိရသည်။
ယင်းနည်းတူ မြင်းကတ်ရွာနီ ဦးကျော်လှိုင်၏ နီအိမ်နားသို့လေ့ လက်နက်ကြီးကျည်တလုံးကျရောက် ပေါက်ကွဲခပြီး ဦးကျော်လှိုင်၏ ညာဖက်ခြီဖနှောင့်နန့် ဒေါ်သိန်းသိန်းယဉ်၏ ဘယ်ဖက်လက်မောင်းရို့တွင် ဒဏ်ရာအသီးသီးရလားခသိမ့်သည်။
အလားတူ လက်ဆောင်ကောက်(မူဆလင်) ရွာထဲသို့လေ့ လက်နက်ကြီးကျည်တလုံးကျရောက်ပေါက်ကွဲခပြီး ကိုဆွေတာမောက်၏ ညာဖက်လက်မောင်းနန့် မောင်မာမတ်နု၏ ခြီနှစ်ဖက်စလုံရို့တွင် ဒဏ်ရာပြင်းပြင်းထန်ထန်ရလားခရသည်။
အုန်းပတီး(မူဆလင်)ရွာမှ ကျောက်တော်မြို့ထက်သို့ ခရီးသည်များပို့ဆောင်နီသည့် စက်လှီတစီးကိုလေ စစ်ကောင်စီတပ်မှ လက်နက်ကြီးများဖြင့် ပစ် ခတ်ခသည့်အတွက် စက်လှီနန့်တတူပါလာသည့် ဦးတာဂျူနန့် ဒေါ်နော်ရော်ဇော်မာရို့တွင် ဒဏ်ရာပြင်း ပြင်းထန်ထန်ရလားကာ အသက်အန္တရာယ် စိုးရိမ်ရကြောင်း သိရသည်။
လက်ဟိအချိန်ထိလေ့ အဆိုပါ ကျောက်တော်အခြီစိုက် စစ်ကောင်စီတပ်ရင်းများမှ လက်နက်ကြီးများဖြင့် ဆက်လက်ပစ်ခတ်နီ ဆဲ ဖြစ်ပြီး လူနီရပ်ရွာများအနားတွင် ကျရောက်က်ပေါက်ကွဲလျက်ဟိနီကာ ဒဏ်ရာရသူများလေ့ ဟိနီနိုင်သိမ့်ကြောင်း သိဟိရပါသည်။
