APM၊ ဂျူလိုင် ၁၁/ ၂၀၂၃
အိန္ဒိယနိုင်ငံ၏ မြောက်ပိုင်းပြည်နယ်များတွင် သုံးရက်အတွင်း မိုးပြင်းပြင်းထန်ထန်ရွာသွန်းရာမှ ရီကြီးမြီပြိုမှုများ ဖြစ်ပွား၍ ဒေနိ(ဂျူလိုင် ၁၁ရက်နိ) မိုးထပိုင်းအထိ သီဆုံးလူဦးရေ ၄၂ယောက်အထိဟိလာ ကြောင်း သိရသည်။
ဟီမာချယ် ပရာဒတ်ချ်ပြည်နယ်၊ ပန်ဂျပ်ပြည်နယ်၊ အက်ထရခန်ပြည်နယ်များတွင် လူသီဆုံးမှုအများဆုံးဖြစ်ကာ ဟီမာချယ် ပရာဒတ်ချ်ပြည်နယ် တခုတည်း၌ ရီကြီးမြီပြိုမှုများကြောင့် သီဆုံးသူ ၂၀ ဟိလာသည်။
ဟီမာချယ်ပရာဒတ်ချ်ပြည်နယ်ဝန်ကြီးချုပ် ဆုခ်ဘင်ဒါ ဆင်းဂ်ဆူခူက “ဒေနှစ်ရီကြီးမြီပြိုမှုသည် နှစ် ၅၀ အတွင်း အဆိုးဆုံး ဖြစ်ပြီး လူသီ ဆုံးမှုများနန့်ပတ်သက်၍ အလေးအနက် ဝမ်းနည်းကြီကွဲရပါကြောင်း” ပြောကြားသည်။
ယင်းအပြင် “အခြေအနီကို ကိုင်တွယ်ရန် ပြည်နယ်အစိုးရအနီနန့်အစွမ်းကုန်ကြိုးပမ်းနီပြီး ရီကြီးမြီပြိုမှုကြောင့် ရူပီး သန်းပေါင်း ၃,၀၀၀၀ လောက် ဆုံးယှုံးလားခကြောင်း ပြည်နယ်ဝန်ကြီးချုပ်က ဆက်လက်ပြောကြားခသည်။
အိန္ဒိယဝန်ကြီးချုပ် နရင်ဒရာမိုဒီက “ဟီမာချယ် ပရာဒတ်ချ်၊ အက်ထရခန် အစဟိသည့် ပြည်နယ် ဝန်ကြီးချုပ်များနန့် ဆွေးနွေးပြီး လိုအပ်သည့် အကူအညီအားလုံးကို ပံ့ပိုးပီးလားမည်”ဟု အာမခံပြောကြားသည်။
အိန္ဒိယမိုးလီဝသဌာနက ဂျူလိုင် ၁၀ရက်နိတွင် ကန်ဂရာ၊ ကူလူ၊ မန်ဒီ၊ သျှင်းမလား၊ ဆိုလန်၊ ဘီလာစပါ၊ ဆာမော၊ ဟန်မာပါ ခရိုင်များ၌ အမြင့်ဆုံးသတိပီးချက်ထုတ်ပြန်ခပြီး ဂျူလိုင် ၁၂ရက်နိအထိ မိုးကြီးနီမည်ဟု ခန့်မှန်းထားသည်။
မိုးပြင်းထန်စွာ ရွာသွန်းခြင်းနန့်အတူ ဂင်္ဂါမြစ်နန့် ဆတ်လဂျ်မြစ်များမှ ရီများမြင့်တက်မှုကြောင့်ဟီမာချယ်ပရာဒတ်ချ် ပြည်နယ်၊ အူတာပရာဒတ်ချ်ပြည်နယ်၊ ဂျမ်မူးနန့် ကက်ချ်မီးယားပြည်နယ်၊ လာဒက်ဒေသရို့တွင် ရီလွှမ်းပြီးမြီပြိုကျခြင်း၊ တန်းတားများ ကျိုးကျခြင်း၊ အဝီးဗြီးလမ်းများနန့် နီအိမ်များ ရီနစ်မြုပ်ခြင်းများ ဆက်လက်ဖြစ်ပွားနီသည်။
Source – North India rain toll rises as water level turns dangerous/ Hindustan Time
Photo – Hindustan Time
