APM ၊ မာ့ချ် ၁၁ / ၂၀၂၄
ကျောက်ဖြူမြို့နယ်မာ ဒေနိ မာ့ချ် ၁၁ ရက်နိခင်း ၁၂ နာရီအချိန်လောက်က အကြမ်းဖက်စစ်ကောင်စီ ထောင်ထားရေမိုင်းကို တက်နင်းမိလို့ ဒေသခံတယောက် ထပ်မံ ဒဏ်ရာရဟိလားကြောင်း သိရပါရေ။
ဒဏ်ရာရလားလူစွာ ကျောက်ဖြူမြို့၊အရာဟိရပ်ကွက်က ဦးယိုင်နုအောင်(၆၅ နှစ်) ဖြစ်ပါရေ။
ဦးယိုင်နုအောင်စွာ မာ့ချ် ၁၁ရက်နိ၊ နိခင်း ၁၂ နာရီလောက်က သူ၏ဇနီးနန့်တတူ သစ်ပုတ်တောင်တိုက်နယ်၊ ဦးကင်းရွာသို့ ဆန်ယူဖို့လားချိန် ဂုံးချွိန်တိုက်နယ်၊ အောင်စေတီရွာအောက်ဖက် ကာရီဘောင်မာ အကြမ်းဖက်စစ်ကောင်စီထောင်ထားရေ မိုင်းကို တက်နင်းမိရာက ပေါက်ကွဲမှုဖြစ်ပွားခပါရေ။
ယင်းပေါက်ကွဲမှုကြောင့် ဦးယိုင်နုအောင်၏ ဘယ်ဖက်ခြီထောက်နားမာ မိုင်းစမှန်ပနာ ထိခိုက်ဒဏ်ရာရဟိလားစွာ ဖြစ်ပါရေ။
လက်ဟိမာတော့ ဦးယိုင်နုအောင်စွာ ကျောက်ဖြူပြည်သူ့ဆီးရုံကြီးမာ ဆီးကုသမှု ခံယူနီရေလို့ ဒေသခံတိက ဆိုပါရေ။
ယင်းအပြင် ကျောက်ဖြူမြို့နယ်မာ ဒေနိ၊ မိုးထကလည်း အကြမ်းဖက်စစ်ကောင်စီထောင်ထားရေ မိုင်းကိုတက်နင်းမိလို့ ဂုံးချွိန်တိုက်နယ်က အရပ်သားပြည်သူတယောက် ခြီတဖက်ပြတ်ထွက်လားခကြောင်း သိရပါရေ။
