APM ၊ မာ့ချ် ၁၁/၂၀၂၄
ဒေနိမာ့ချ် ၁၁ရက်နိ၊မွန်းလွဲပိုင်းက ကျောက်ဖြူမြို့နယ်၊ဇင်ချောင်းတိုက်နယ်၊ဇင်ချောင်း(တောင်ရင်း)ရွာကို အကြမ်း ဖက်စစ်ကောင်စီ နေဗီက ရည်ရွယ်ချက်ဟိဟိ လက်နက် ကြီးနန့်ပစ်လို့ လူနီအိမ်တဆောင် ပျက်စီးလားခကြောင်း သိရပါရေ။
ပျက်စီးလားခရေ အိမ်စွာ ဇင်ချောင်း(တောင်ရင်း)ရွာက ဦးညွန့်မောင်ဦး၏ အိမ်ဖြစ်ပါရေ။
ဇင်ချောင်းရွာအောက်ဟိ ပင်လယ်ပြင်နားမာ တန့်ထားရေ အကြမ်းဖက်စစ်ကောင်စီနေဗီစွာ မာ့ချ် ၁၁ ရက်နိ၊ မွန်းလွဲ ၂ နာရီ အချိန်လောက်က ကျောက်ဖြူမြို့နယ်၊ဇင်ချောင်းတိုက်နယ်၊ ဇင်ချောင်း (တောင်ရင်း) ရွာကို ရည်ရွယ်ချက်ဟိဟိလက်နက်ကြီးနန့်ပစ်ခတ်ခရေလို့ ဒေသခံတိက ပြော ပါရေ။
ယင်းပိုင်အကြမ်းဖက်စစ်ကောင်စီက ရည်ရွယ်ချက်ဟိဟိ ပစ်ခတ်လိုက်တေလက်နက်ကြီးကျည် တလုံးစွာ ဦးညွန့်မောင်ဦး၏အိမ်နားသို့ ကျရောက်ပေါက်ကွဲခလို့ ယင်းအိမ်ပျက်စီးလားခရစွာ ဖြစ်ပါရေ။
ယင်းအပြင် ဒေနိတရက်တည်းမာ ညဇာ ၃ နာရီအချိန်ကလည်း အကြမ်းဖက်စစ်ကောင်စီ၏ အဆိုပါနေဗီက ထပ်မံပစ်ခတ်လိုက်တေ လက်နက်ကြီးကျည် ၂လုံးစွာ ၎င်းရွာဟိ ဘုန်းကြီးကျောင်း သစ်ခွပင်ကြီးတပင်အနားမာ ကျရောက်ပေါက်ကွဲခပါသိမ့်ရေလို့ သိဟိရပါရေ။
