APM၊ မာ့ချ် ၁၁ / ၂၀၂၄
ရက္ခိုင့်တပ်တော် ထိုးစစ်ဆင် တိုက်ခိုက်မှုတိအတွင်း အဖက်ဖက်က ကျဆုံးနီရရေ အကြမ်းဖက်စစ်ယှုံး စစ်ကောင်စီစွာ ဒေနိ မာ့ချ် ၁၁ ရက်နိမာလည်း ရမ်းဗြဲမြို့နန့် ရမ်းဗြဲကျွန်းထက်က နီရာအများအပြားကို လီကြောင်း၊ ရီကြောင်းတိကနီ ပြင်းပြင်းထန်ထန် ဆက်လက် ပစ်ခတ် တိုက်ခိုက်နီခကြောင်း သိရပါရေ။
ဒေနိ မာ့ချ် ၁၁ ရက်နိ၊ မိုးထ ၆ နာရီ ၂၀ မိနစ်အချိန်ခန့်မာ အကြမ်းဖက်စစ်ကောင်စီ၏ Y 12 ထောက်ပို့လီယာဉ်စတင်ပျံသန်းလာပြီးကေ မိုးထ ၆ နာရီ ၂၈ မိနစ်မှ မိုးထ ၈ နာရီ ၆ မိနစ် အချိန်ခန့်အထိ စုစုပေါင်းလက်နက်ကြီး (၁၂၆)ကြိမ်တိတိ ဆက်တိုက်ပစ်ခတ်တိုက်ခိုက်ခပါရေ။
ယင်းနောက် မိုးထ ၁၀ နာရီ အချိန်ခန့်မာ အကြမ်းဖက်စစ်ကောင်စီ၏ Mi- 35 တိုက်ခိုက်ရီး ရဟတ်ယာဉ်စတင်ပျံဝဲလာပြီးကေ မိုးထ ၁၀ နာရီ ၆ မိနစ်အချိန်ခန့်မှ မိုးထ ၁၀ နာရီ ၁၆ မိနစ်အချိန်ခန့်အထိ လက်နက်ကြီး၊ လက်နက်ချေတိနန့် တရစပ် ဆက်တိုက်ပစ်ခတ်ခပါသိမ့်ရေ။
တချိန်တည်းမာပင် အကြမ်းဖက်စစ်ကောင်စီ၏ ဂျက်ဖိုက်တာကလည်း ဒေနိ မိုးထ ၁၀ နာရီ ၉ မိနစ်မာ (၁) ကြိမ်၊ မိုးထ ၁၀ နာရီ ၁၄မိနစ်မာ (၁) ကြိမ်၊ မိုးထ ၁၀ နာရီ ၃၉ မိနစ်မာ (၁) ကြိမ်၊ မိုးထ ၁၀ နာရီ ၄၁ မိနစ်မာ (၁) ကြိမ်၊ နိခင်း ၁၂ နာရီ ၂ မိနစ်မာ (၁) ကြိမ်၊ နိခင်း ၁၂ နာရီ ၁၀ မိနစ်မာ (၁)ကြိမ်၊ နိခင်း ၁၂ နာရီ ၁၅ မိနစ်မာ (၁) ကြိမ်၊ နိခင်း ၁၂ နာရီ ၁၈ မိနစ်မာ (၁)ကြိမ်၊ နိခင်း ၁၂ နာရီ ၂၂ မိနစ်မာ (၁)ကြိမ် စုစုပေါင်း (၉) ကြိမ် တိုင်တိုင် ပစ်ခတ်ခပြန်ပါရေ။
ယင်းနောက် အကြမ်းဖက်စစ်ကောင်စီ၏ Mi-35 တိုက်ခိုက်ရီးရဟတ်ယာဉ်ကလည်း ဒုတိယအကြိမ် ပြန်ရောက် လာပြီးကေ နိခင်း ၁၂ နာရီ ၂၈ မိနစ်မှ နိခင်း ၁၂ နာရီ ၃၅ မိနစ်အချိန်အထိ လက်နက်ကြီး၊ လက်နက်ချေတိနန့် ရမ်းဗြဲမြို့ကိုဆက်လက်ပစ်ခတ်တိုက်ခတ်ခပါရေ။
အလားတူ ကလိန်တောင်မြစ်မာ တန့်ထားရေ အကြမ်း ဖက်စစ်ကောင်စီ၏ နေဗီကလည်း ဒေနိညဇာ ၃ နာရီ ၄၃ မိနစ်မာ (၁)ကြိမ်၊ မွန်းလွဲ ၃ နာရီ ၄၆ မိနစ်မာ (၁) ကြိမ်စုစုပေါင်း (၂) ကြိမ်ဆက်တိုက်ပစ်ခရေပိုင် လက်ဟိအချိန်အထိလည်း လီကြောင်း၊ ရီကြောင်းကနီ တိုက်ခိုက်မှုတိ ပြင်းပြင်းထန်ထန် ဆက်လုပ်နီတုန်းလို့ ဒေသခံတိက ပြောပါရေ။
အေနိ အကြမ်းဖက်စစ်ယှုံးစစ်ကောင်းစီ၏ ရီကြောင်း၊ လီကြောင်းတိုက်ခိုက်မှုအတွင်း ရမ်းဗြဲမြို့ထက်ရပ်ကွက်တိ အပါအဝင် ရမ်းဗြဲမြို့နယ်က မြို့၊ ရွာတချို့သို့ ကျရောက် ပေါက်ကွဲခကြောင်း သိရပါရေ။
