စစ်ကောင်စီတပ်ဖွဲ့ဝင်များ ဘင်္ဂလားဒေ့ချ်နိုင်ငံထဲ ခိုးဝင်ထွက်ဗြီးလားကြောင်း ရက္ခိုင့်တပ်တော် ထုတ်ပြန်
APM၊ မာ့ချ် ၁၁/၂၀၂၄
မောင်တောမြောက်ပိုင်းဟိ အောင်သပြေ နယ်ခြားစောင့်တပ်စခန်းမှ စခန်းစွန့်ခွာလာကတ်တေ စစ်ကောင်စီတပ်ဖွဲ့ဝင်တိနန့် ရက္ခိုင့်တပ်တော်ရို့စွာ မာ့ချ် ၁၀ ရက်နိ၊ ညဇာ ၄ နာရီကပင် တိုက်ပွဲစလို့ဖြစ်ပွားခရာ ဒေနိ၊မာ့ချ် ၁၁ ရက်နိမာလည်း ရက္ခိုင့်တပ်တော်က ဖြတ်တောက်ဝိုင်းရံ ပိတ်ဆို့ထားရေအတွက် တိုက်ပွဲတိ ဆက်လက်ပြင်းထန်နီရေလို့ ရက္ခိုင့်တပ်တော်၏ ဒေနိထုတ်ပြန်ချက်ထဲမာ ဖော်ပြထားပါရေ။
ရက္ခိုင့်တပ်တော်က ယင်းစစ်ကြောင်းကို လိုက်လံခြီမှုန်းတိုက်ခိုက်တေအတွက် စခန်းစွန့် နယ်ခြားစောင့်တပ်ဖွဲ့ဝင်တိရေ တဖက်ဘင်္ဂလာဒေ့ချ်နိုင်ငံအတွင်းသို့ ခိုးဝင်ဖြတ်ကျော် ထွက်ဗြီးလားခကတ်တေလို့ ရက္ခိုင့်တပ်တော်က ဖော်ပြပါရေ။
လက်ဟိအချိန်အထိ ဘင်္ဂလာဒေ့ချ်နိုင်ငံအတွင်းသို့ ယင်းပိုင်မျိုး ထွက်ဗြီး လွတ်မြောက်နီရေ နယ်ခြားစောင့် စစ်ကောင်စီတပ်ဖွဲ့ဝင် ရာကျော်အထိ ဟိနိုင်ရေလို့လည်း ဆိုပါရေ။
အလားတူ ညကမာ့ချ် ၁၀ ရက်နိ၊ ညဇာ ၇ နာရီလောက်က စလို့ ရသေ့တောင်အခြီစိုက် စစ်ကောင်စီ၏ တပ်ရင်းဌာနချုပ်တိကို ရက္ခိုင့်တပ်တော်ကထိုးစစ်ဆင်တိုက်ခိုက်လျက်ဟိရာ ဒေနိခါလည်း ဆက်လက်ပြီး ထိုးစစ်မြှင့်တိုက်ခိုက်နီရေလို့ သိရပါရေ။
ယင်းအပြင် ရက်ပေါင်း(၈၅)ရက်ကြာတိုက်ခိုက်လာခရေ ရမ်းဗြဲမြို့ကိုလည်း အကြမ်းဖက်စစ်ကောင်စီ၏ပြင်းထန်ရေ ကြည်း၊ ရီ၊ လီခုခံစစ်တိကြားက ရက္ခိုင့်တပ်တော်စွာ ဒေနိ၊ မာ့ချ် ၁၁ ရက်နိ၊ နိခင်း ၁ နာရီ ၁၅ မိနစ်အချိန်မာ အပြီးသတ် သိမ်းပိုက်လိုက်တေလို့ ထုတ်ပြန်ချက်ထဲမာ ဖော်ပြထားပါရေ။
