APM ၊ ဩဂတ်စ် ၁၀ /၂၀၂၃
ရီကြီးမှုဒဏ်အဆိုးဝါးဆုံးခံခရသည့် ကျောက်တော်နန့် မြောက်ဦးမြို့နယ်များမှ စစ်ဖီးယှောင်စခန်းတချို့ဟိ ယာယီနီအိမ် ရာချီပျက်စီးခရပြီး၊ ပြုပျင်ရန် အကူအညီများ လိုအပ်နီကြောင်း သိရသည်။
ပျက်စီးခသည့် စစ်ဖီးယှောင်စခန်းများမှာ ကျောက်တော်မြို့နယ်၊ ညောင်ချောင်းစစ်ဖီးယှောင်စခန်းမှ နီအိမ် ၁၄၂ ဆောင်၊ မြောက်ဦးမြို့နယ်၊ တိမ်ညိုစစ်ဖီးယှောင်စခန်းမှ ၂၀၀ လောက်နန့် မြတန်ဆောင်းစစ်ဖီးယှောင်စခန်းမှ နီအိမ် ၃၂ ဆောင် ပျက်စီးခရသည်။
အဆိုပါစစ်ဖီးယှောင်စခန်းများတွင် ပြီးခသည့် ရက်ပိုင်းက မိုးကြီးပြီး မြစ်ချောင်းရီများမြင့်တက်မှုကြောင့် ရီ ၆ ပေလောက် မြင့်တက်ခကာ ယာယီနီအိမ်အများစု၌ အိမ်တိုင်များ ယိုင်လားပြီး၊ နံရံများ ပျက်စီးခရသည်ဟု စခန်းတာဝန်ခံများက ပြော သည်။
လက်ဟိတွင် ပျက်စီးလားသည့် နီအိမ်များကို ဖြစ်တေပိုင် ပြုပျင်နီကတ်ရ၍ သစ်၊ ဝါး အကူအညီများ အပူတပြင်းလိုအပ်နီ သည်ဟု ဆိုသည်။
ညောင်ချောင်းစစ်ဖီးယှောင်စခန်းတွင် အိမ်ထောင်စု ၆၂၉ စု၊ တိမ်ညိုစစ်ဖီးယှောင်စခန်းတွင် အိမ်ထောင်စု ၇၈၃ စုနန့် မြတန် ဆောင်းစစ်ဖီးယှောင်စခန်းတွင်အိမ်ထောင်စု ၂၄၃ စု အသီးသီး နိထိုင်လျက်ဟိသည်။
ရက္ခိုင်တွင် မေ ၁၄ ရက်နိက တိုက်ခတ်ခသည့် Mocha ဆိုင်ကလုန်းမုန်တိုင်းကြောင့် စစ်ဖီးယှောင်စခန်းအများစု ထိခိုက် နစ်နာခရပြီး၊ တချို့စခန်းများမှာ လက်ဟိအချိန်ထိ အမိုးအကာအောက်သို့ရောက်ရန် ခက်ခဲနီတုန်းဖြစ်ကာ ဒေဂုနောက်ထပ် ရီကြီးမှုကြောင့်လေ့ ပြန်လည်ထူထောင်ရီး ပို၍ အခက်ကြုံနီကတ်ရကြောင်း သိရသည်။
