
APM ၊ ဂျူလိုင် ၁၀ / ၂၀၂၃
မြန်မာစစ်တပ်ဖမ်းဆီးလားပြီး မြန်မာပြည်ဆူပူလှုံဆော်မှုဆိုင်ရာ ဥပဒေ ပုဒ်မ ၅၀၅ (က) နန့် တရားစွဲခံထားရသည့် သံတွဲက ထွေအုပ်ဝန်ထမ်းတယောက်ကို ဂျူလိုင် ၇ ရက်နိတွင် သံတွဲခရိုင်တရားရုံးက ထောင်ဒဏ် ၂ နှစ် ချမှတ်လိုက်ကြောင်း သိရသည်။
ထောင်ချမှတ်ခံရသူမှာ သံတွဲခရိုင် အထွေထွေ အုပ်ချုပ်ရီးဦးစီးဌာက အကြီးတန်းစာရီး ဦးဝင်းမောင်မောင်ဖြိုး ဖြစ်သည်။
ကုန်ခသည့် ၂၀၂၂ ခုနှစ်၊ အောက်တိုဘာ ၇ ရက်နိတွင် ဦးဝင်းမောင်မောင်ဖြိုးနန့် ပြည့်ဖြိုးသန္တာ ဆောက်လုပ်ရီးကုမ္ပဏီ မန်နေဂျင်းဒါရိုက်တာ ဦးအောင်ကျော်ဝင်းရို့ကို မြန်မာစစ်တပ်၏ ငပလီမြို့အခြီစိုက် ခလရ(၅၅)တပ်ရင်းက ဖမ်းယူလား ခသည်။
ယင်းနောက် ဦးဝင်းမောင်မောင်ဖြိုးကို ရက္ခိုင့်တပ်တော်AA ၏ သတင်းပီးဟုဆိုကာ မတရားအသင်းဆက်သွယ်မှု ပုဒ်မ ၁၇(၁)၊ မြန်မာပြည်ဆူပူလှုံဆော်မှုပုဒ်မ ၅၀၅(က) ရို့နန့် တရားစွဲဆိုခသည်။
လက်ဟိတွင် ဦးဝင်းမောင်မောင်ဖြိုးမှာ ၅၀၅ (က)နန့် ထောင်ဒဏ် ၂ နှစ်ချမှတ်ခံထားရကေလေ့ ၁၇ (၁) နန့် တရားရင်ဆိုင်နီ ရသိမ့်ကာ လာမည့် ဂျူလိုင် ၂၁ ရက်နိတွင် ထပ်မံ ရုံးချိန်းထားကြောင်း သိရသည်။
