APM ၊ မေ ၁၀ / ၂၀၂၄
မောင်တောမြို့နယ်မာ မေ ၉ ရက်နိ၊ မိုးထပိုင်းက အကြမ်းဖက်စစ်ကောင်စီတပ်နန့် ၎င်းရို့လက်အောက်ခံဘင်္ဂလီပူးပေါင်းအဖွဲ့ ဖမ်းဆီးသတ်ဖြတ်ခလို့ အပြစ်မဲ့ပြည်သူနှစ်ယောက် သီဆုံးလားရေလို့ သိရပါရေ။
သီဆုံးလားရေလူတိမာ မောင်တောမြို့နယ်၊ ခရေမြိုင်ရွာက ဦးသံလုံး (၅၀ နှစ်)နန့် ရွာသာယာရွာက ဦးမောင်ဆိုး(၃၀ နှစ်)ရို့ဖြစ်ပါရေ။
မေ ၉ ရက်နိ၊မိုးထ ၁၁ နာရီလောက်က ဦးသံလုံးနန့်ဦးမောင်ဆိုးရို့စွာ ရွာသာယာရွာကနီ ၃/မိုင်သို့ ဆိုင်ကယ်တစီးနန့် လားခကတ်ရာ ယင်းလမ်းမာ လားနီရေ အကြမ်းဖက်စစ်ကောင်စီတပ်ဖွဲ့ဝင်နန့်၎င်းရို့လက်အောက်ခံဘင်္ဂလီပူးပေါင်းစစ်ကြောင်းနန့်တွိလို့ ရက်ရက်စက်စက် သတ်ဖြတ်ခံခရစွာလို့ ဒေသခံတိက ပြောပါရေ။
ယင်းနိ(မေ ၉ ရက်နိ) တရက်တည်းမာပင် အကြမ်းဖက်စစ်ကောင်စီနန့် ဘင်္ဂလီပူးပေါင်းအဖွဲ့စွာ မောင်တောမြို့နယ်၊ ရွှီရင်အီးရွာကို မီးတိုက်ဖျက်ဆီးခရေလို့ အပြစ်မဲ့ပြည်သူနီအိမ် ၅၀ ကျော်မီးလောင်ပြာကျလားခပါသိမ့်ရေ။
အလားတူ မေ ၇ ရက်နိကလည်း အကြမ်းဖက်စစ်ကောင်စီနန့်ဘင်္ဂလီပူးပေါင်းအဖွဲ့ဝင်တိ မောင်တောမြို့နယ်၊ ဝေသာလီရွာကို စီးနင်းပစ်ခတ်ဝင်ရောက်လာပနာ နီအိမ်တိမီးတိုက်ဖျက်ဆီးခလို့ ရွာသားတယောက်သီဆုံးလားခပြီးကေ၊၂ ယောက် ဒဏ်ရာရလားခရေပိုင် လူနီအိမ် ၁၅ ဆောင်လည်း မီးလောင်ပျက်စီးလားရေလို့ သိဟိရပါရေ။
