
APM ၊ မာ့ချ် ၁၀ / ၂၀၂၄
မာ့ချ် ၉ ရက်နိ၊ညည့်မာ စစ်တွေမြို့၊ ကသဲရပ်ကွက်ကို အကြမ်းဖက်စစ်ကောင်စီက လက်နက်ကြီးနန့် ရည်ရွယ်ချက်ဟိဟိ ပစ်ခတ်တိုက်ခိုက်ခလို့ ဒေသခံမူဆလင် ၅ ယောက်ထက်မနည်းသီဆုံးလားပြီးကေ အများအပြား ဒဏ်ရာရလားကြောင်း သိရပါရေ။
မာ့ချ် ၉ ရက်နိ၊ ညည့် ၁၁ နာရီကျော်လောက်မာ စစ်တွေ အခြီစိုက် အကြမ်းဖက်စစ်ကောင်စီ၏ အမှတ် (၁၂)ရဲတပ်ရင်းကနီ လက်နက်ကြီး နန့် ပစ်ခတ်ခစွာဖြစ်ပြီးကေ ကသဲရပ်ကွက်ထဲ ကျရောက်ပေါက်ကွဲခရေလို့ မျက်မြင်ဒေသခံတိက ပြောပါရေ။
ယင်းလက်နက်ကြီးကျည်ကျရောက်ပေါက်ကွဲခလို့ ကသဲရပ်ကွက်ဟိ အရပ်သားပြည်သူ မူဆလင်လူမျိုး ၅ ယောက်ထက်မနည်းသီဆုံးလားပြီးကေ အများအပြား ဒဏ်ရာရလားရေလို့ ဆိုပါရေ။
သီဆုံး၊ ဒဏ်ရာရလူတိနန့်ပတ်သက်လို့ အသေးစိတ်အချက်အလက်ကိုတော့ APM က ဆက်လက်စုံစမ်းနီပါရေ။
ရက္ခိုင့်တပ်တော်၏ ထိုးစစ်ဆင်တိုက်ခိုက်မှုတိအတွင်း မရှုမလှကျယှုံးနီရေ အကြမ်းဖက်စစ်ကောင်စီစွာ အရပ်သားပြည်သူတိ နီထိုင်ရာ မြို့၊ရွာ၊ အဆောက်အအုံတိကို နိစဉ်ရက်ဆက်ပစ်ခတ်ဖျက်စီးလို့ဟိနီပါရေ။
တဖက်မာလည်း ရက္ခိုင်ပြည်အတွင်းနီထိုင်ရေ ဒေသခံမူဆလင်လူမျိုးတိကို စစ်သင်တန်းပီး၊ လက်နက်တပ်ဆင်ထားရေပိုင်၊ အခြားတဖက်မာ ဒေသခံ မူဆလင်လူမျိုးတိနီထိုင်ရာ ရပ်ရွာတိကို လက်နက်ကြီးတိနန့်ပစ်ပြီးကေ၊ ရက္ခိုင့်တပ်တော်ကို အပြစ်ပုံချလျက် လူမျိုးရီး၊ ဘာသာရီး ပဋိပက္ခဖြစ်အောင်ဖန်တီးလို့ ဟိနီပါရေ။
