APM ၊ အောက်တိုဘာ ၁၀/ ၂၀၂၃
အမ်းမြို့နယ်မာ ဒေနိ(အောက်တိုဘာ ၁၀ ရက်နိ)နိခင်းက ရီလုပ်သားတယောက် ရီမြုပ်သီဆုံးလားကြောင်း သိရပါရေ။
ရီမြုပ်သီဆုံးလားရေလူစွာ မြေပုံမြို့နယ်၊ ကောက်ကွေကျေးရွာက ဦးရဲလင်းကို (၃၀နှစ်) ဖြစ်ပြီးကေ သူရေ အမ်းမြို့နယ်၊ ရီဘုတ်ကျေးရွာအုပ်စု၊ ငရစ်ချောင်းပုဇွန်မွီးမြူရီးကန်မာ အလုပ်လုပ်နီရေ အလုပ် သမားတယောက်လို့ သိရပါရေ။
ဦးရဲလင်းကိုစွာ ပုဇွန်မွီးမြူရီးကန်ဆည်ဘောင်ပေါက်နီလို့ အပေါက်ကို ပြန်ပျင်ဖို့ ရီထဲဆင်းချိန် ရီစီးကြောင်းနန့်မျောပနာ ပြွန်ခေါင်းထဲဝင်လားပြီးကေ ရီမြုပ်သီဆုံးလားစွာလို့ မျက်မြင်ဒေသခံတိက ပြောပါရေ။
အောက်တိုဘာ ၈ ရက်နိကလည်း မင်းပြားမြို့နယ်၊ နဂရာအုပ်စု၊ သရက်အုပ် (မူဆလင်)ရွာမာ အသက် ၅ နှစ်အရွယ်အချေတယောက် ရီမြုပ်သီဆုံးခပါသိမ့်ရေ။
ပြီးခရေ စပ်တမ်ဘာလအတွင်းက ရက္ခိုင်ပြည်မြို့နယ်တိမာ အကြောင်းအမျိုးမျိုးကြောင့် ရီမြုပ်သီဆုံးလူ ၁၈ ယောက်ထက်မနည်းဟိခပြီးကေ ယင်းအထဲ အချေ ၅ ယောက်ပါဝင်ပါရေ။
