APM ၊ ဩဂတ်စ် ၁ / ၂၀၂၃
အိန္ဒိယနိုင်ငံမြောက်ပိုင်း ဟာယနာပြည်နယ်တွင် ဂျူလိုင် ၃၁ ရက်နိက ဟိန္ဒူနန့်မူဆလင်အကြား ဘာသာရီးပဋိပက္ခတခု ဖြစ်ပွားမှုကြောင့် လူ ၅ယောက် သီဆုံးကာ ၇၀ကျော် ထိခိုက်ဒဏ်ရာရဟိခကြောင်း သိရသည်။
နယူးဒေလီမြို့၏တောင်ဘက် ၇၅ ကီလိုမီတာအကွာဟိ နူးခရိုင်တွင် ဟိန္ဒူဘာသာရီး စီတန်းလှည့်လည်ပွဲတခုကျင်းပနီစဉ် မူဆလင်အုပ်စုများနန့် ရုန်းရင်းဆန်ခတ်ဖြစ် ပွားရာမှ လူ ၄ ယောက်သီဆုံးခကြောင်း နူးခရိုင်ရဲတပ်ဖွဲ့ပြောခွင့်ရ ခရစ်ချန် ကူးမား ကပြောကြားသည်။
ပဋိပက္ခအတွင်း တဖက်နန့်တဖက်အပြန်အလှန် ကျောက်သီးနန့်ပစ်ကတ်ရာ ဝင်ရောက်ဖျန်ဖြေရန်ကြိုးစားခသည့် အရံ ရဲတပ်ဖွဲ့ဝင် ၂ ယောက်အပါအဝင် ၄ ယောက် သီဆုံးခပြီး ညည့်ပိုင်းလေ့ပဋိပက္ခများဆက်လက် ဖြစ်ပွားရာတွင် ဗလီ တလုံးမီးတိုက်ခံရမှုအတွင်း မော်လဝီတယောက်ထပ်မံသီဆုံးခခြင်းဖြစ်သည်။
ဘတ်စ်ကားများ၊ မော်တော်ယာဉ်များနန့် ဆိုင်ကယ်များ အများအပြား မီးတိုက်ဖျက်ဆီးခံခရပြီး ညဇာပိုင်းအထိ ပဋိပက္ခ များအတွင်း လူပေါင်း ၂၅၀၀ လောက်တိုးလာရာ လုံခြုံရီးတပ်ဖွဲ့ဝင်များက အဓိက ဘာသာရီးအဆောက် အအုံများတွင် လုံခြုံရီး ယူကာ လူအုပ်များကို ဖြိုခွဲခရကြောင်း သိရသည်။
ရဲတပ်ဖွဲ့က အကြမ်းဖက်မှုဖြစ်စဉ်များနန့်ပတ်သက်၍ လူပေါင်း ၈၀ ကျော်ကို ဖမ်းဆီးခပြီး အစိုးရအရာဟိများသည် နှစ်ဖက် စလုံးမှ ဂေါင်းဆောင်ပိုင်းများနန့် တွိဆုံကာ ပဋိပက္ခထပ်မဖြစ်အောင် ညှိနှိုင်းဆွေးနွေးခကတ်သည်။
လက်ဟိတွင် နူးခရိုင်အတွင်း လူစုဝေးခြင်းကို တားမြစ်ပိတ်ပင်သည့် အမိန့် ထုတ်ပြန်ထားပြီး မိုဘိုင်းအင်တာနက် ဝန်ဆောင် မှုများကို ဩဂတ်စ် ၂ ရက်နိအထိ ပိတ်ထားရန် ပြည်နယ်အစိုးရက သတ်မှတထားသည်။
ယင်းအပြင် ခရိုင်အတွင်း ကျောင်းများနန့် ကောလိပ်များကို ပိတ်ထားရန် ညွှန်ကြားထားပြီး အကြမ်းဖက်မှုများကို ရှုံ့ချ ကြောင်း ဟာယနာပြည်နယ်ဝန်ကြီးချုပ် Manohar Lal Khattar က ပြောကြားသည်။
Source – Haryana Violence Live Updates: 5 Dead In Communal Clashes In Nuh And Gurugram
Photo NDTV
