APM ၊ ဂျုန် ၁ /၂၀၂၄
ပေါက်တောမြို့နယ်မာ ဒေနိ( ဂျုန် ၁ ရက်နိ) မိုးထပိုင်းအချိန် စစ်ကောင်စီက Y12 စစ်ထောက်ပို့လီယာဉ် အသုံးပြု ဗုံးကြဲချမှုကြောင့် ဒေသခံ နှစ်ယောက် ဒဏ်ရာရ လားရေ လို့ သိရပါရေ။
ဒဏ်ရာရလားလူတိမာ ပေါက်တောမြို့နယ် ကြိမ်ခမော်ပိုက်ဆိပ်(ရွှီချောင်းဝ) ရွာက ကိုထွန်းဝင်းချေ (၂၉နှစ်) နန့် ကြိမ်ခမော်ရွာ ဦးကျော်သံသာ (၅၉ နှစ်) ရို့ဖြစ်ကတ်ပါရေ။
ဒေနိမိုးထ ၉ နာရီ လောက်ကပင်စပြီးကေ စစ်ကောင်စီစွာ Y 12 စစ်ထောက်ပို့လီယာဉ်တစီးနန့် ပေါက်တောမြို့နယ်၊ သံခုံရွာကို ဗုံးသီး ၄ လုံး၊ တောင်ဦးမော် တောင်းစွန်းကို ၆ လုံးနန့် ကြိမ်ခမော်ရွာကို ၇ လုံးကြဲချခပါရေ။
ယင်းပိုင် ဗုံးကြဲချမှုကြောင့် ကို ထွန်းဝင်းချေ ၏ ဘယ်ဖက်လက်မောင်းနန့် မျက်မာရို့မာ ဗုံးစဖောက်ဝင်ပနာ ပြင်းပြင်းထန်ထန် ဒဏ်ရာရလားရေပိုင် ဦးကျော်သံသာ၏ ညာဖက် လက်မာလည်း ဗုံးစ ထိမှန်ဒဏ်ရာရလားရေလို့ ဆိုပါရေ။
လက်ဟိမာ ယင်းဒဏ်ရာရလားရေ လူနှစ်ယောက်ကို အရေးပေါ် ဆီးကုသလို့ဟိနီပြီးကေ ကိုထွန်းဝင်းချေကတော့ ဒဏ်ရာပြင်းထန်လို့ အသက်အန္တရာယ် စိုးရိမ်ရရေလို့ သိဟိရပါရေ။
