APM၊ ဂျုန် ၁ / ၂၀၂၄
ပုဏ္ဏားကျွန်းမြို့နယ် ယိုးတရုပ်ရွာကို ဒေနိ (ဂျုန် ၁ ရက်နိ) မိုးထပိုင်းမာ စစ်ကောင်စီက Y-12 လီယာဉ်နန့် ရည်ရွယ်ချက်ဟိဟိ ဗုံးလာကြဲလို့ ၁၀ နှစ်အရွယ် အချေ တယောက်အပါအဝင် ၂ ယောက်ထက်မနည်း သီဆုံးလားပြီးကေ ၁၁ ယောက်ထက်မနည်း ဒဏ်ရာရလားရေလို့ သိရပါရေ။
သီဆုံးလာလူတိမာ မောင်ကျော်လွင် (ခေါ်) ဒေါင်းဒေါင်း (၁၀နှစ်)နန့် မခိုင်မိုးအေး (၂၆နှစ်)ရို့ဖြစ်ကတ်ပါရေ။
“ဒေနိ (ဂျုန် ၁ ရက်နိ)မိုးထ ၁၀ နာရီလောက်မာ စစ်ကောင်စီ၏ Y-12 လီယာဉ် တစီးစွာ ယိုးတရုပ်ရွာ လူနီရပ်ကွက်တိကို ရည်ရွယ်ချက်ဟိဟိ ဗုံး ၆ လုံးကြဲချလားရေ” လို့ ယိုးတရုပ်ဒေသခံ တယောက်က ပြောပါရေ။
အဆိုပါဗုံးကြဲမှုကြောင့် မောင်ကျော်လွင်နန့် မခင်မိုးအေးစွာ နီရာမာပင် ဂွင်ချင်းသီဆုံးလားရေပိုင် တခြား ၁၁ ယောက်ထက်မနည်းလည်း ပြင်းထက်ဒဏ်ရာလားပြီးကေ ယင်းအထဲ အသက်အန္တရာယ်စိုးရိမ်ရရေလူတချို့လည်းဟိရေလို့ ဆိုပါရေ။
ယင်းအပြင် နီအိမ်၊အဆောက်အအုံတချို့လည်း ပျက်စီးလားရပါသိမ့်ရေ။
ဒေနိ မိုးထ ၉ နာရီလောက်လည်း စစ်ကောင်စီ၏ Y12စစ်ထောက်ပို့ လီယာဉ် တစီးစွာ ပေါက်တောမြို့နယ် သဲခုံရွာ၊တောင်ဦးမော်တောင်စွန်း၊ကြိမ်ခမော် ရို့ကို ဗုံးကြဲချလို့ ကြိမ်ခွေမော်ရွာသား ၂ ယောက် ဒဏ်ရာရလားပါသိမ့်ရေ။
စစ်ကောင်စီစွာ အာရက္ခတပ်တော်၏ ထိုးစစ်ဆင်တိုက်ခိုက်မှုတိကို ခုံခံ၊ ရင်မဆန့်ဝံရေ အပြင် အယှုံးကြီးယှုံးနိမ့်နီရေ အတွက် အာရက္ခပြည်သူတိကိုရာ ပစ်မှတ်ထားပနာ ဂုဏ်သိက္ခာမဲ့ရေ အောက်တန်းကျအကြမ်းဖက် လုပ်ရက်တိ နန့် ဗုံးကြဲတိုက်ခိုက်စွာ၊လက်နက်ကြီးပစ်စွာတိကို နိစဥ်ရက်ဆက် တရစပ် ပြုလုပ်နီပါရေ။
