APM ၊ ဂျုန် ၁ /၂၀၂၃
ရက္ခိုင်တွင် မေ ၂၆ ရက်နိမှ မေ ၃၁ ရက်နိအထိ ၅ ရက်အတွင်း မိုးကြိုး ပစ်ခံရ၍ သီဆုံးသူ ၅ ယောက်အထိဟိလာကြောင်း APM က ကောက်ယူရဟိထားသည့်စာရင်းများအရ သိရသည်။
သီဆုံးလားသူများမှာ မင်းပြားက ၁ ယောက်၊ ရမ်းဗြဲက ၂ ယောက်၊ ကျောက်ဖြူက ၁ ယောက်နန့် ရသေ့တောင်က ၁ ယောက်ဖြစ်သည်။
မင်းပြားမြို့နယ်တွင် မေ ၃၁ ရက်နိက လယ်ကမ်းသင်းဆည်ရာမှ ရွာသို့ ပြန်လာစဉ် မိုးကြိုးပစ်ခံရပြီးအသက် ၁၉ နှစ်အရွယ် ကို လင်းလင်း ကျော် ဆိုသူ လူငယ်တယောက် သီဆုံးလားခရသည်။
ယင်းမေ ၃၁ ရက်နိတရက်တည်းမှာပင် ရမ်းဗြဲမြို့နယ်၊လေးတောင်မြို့တွင်လေ့ ဖုန်းအားသွင်းလျက် ဂိမ်းကဇတ်နီစဉ် မိုးကြိုးပစ်ခံရ၍ မောင်လင်းလင်းထွန်း(၁၃ နှစ်)နန့် မောင်မြင့်မြတ်မောင်(၁၅ နှစ်)ရို့ သီဆုံးလားခရသိမ့်သည်။
အလားတူ မေ ၃၀ ရက်နိကလေ့ ကျောက်ဖြူမြို့နယ်တွင် စက်လှီတစ်စီး မိုးကြိုးပစ်ခံရ၍ ဒေသခံတယောက်ပွဲချင်းပြီးသီ ဆုံးခရပြီး နောက်ထပ်တယောက် ဒဏ်ရာအပြင်းအထန်ရလားခရသည့်အပြင် မေ ၂၄ ရက်နိ၌ ရသေ့တောင်မြို့နယ်၊ ပြိန်း တောရွာက အသက် ၄ နှစ်အရွယ်အချေတယောက်လေ့ မိုးကြိုးပစ်ခံရ၍ သီဆုံးလားခရကြောင်း သိရသည်။
မိုးလီဝသနန့်ဇလဗေဒ ဦးစီးဌာန(မိုး/ဇလ) ကတော့ ရက္ခိုင်တွင် မိုးတိမ်တောင်များဖြစ်ထွန်းမှုအားကောင်းနီပြီး၊ ယင်း မိုးတိမ် တောင် များရွိလျားရာနီရာတလျှောက် မိုးရွာသွန်းခြင်းနန့်အတူလီပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနန့် မိုးသီးကြွီခြင်းစသည့် မိုးလီဝသဖြစ်စဉ်များ ဖြစ်ပေါ်နိုင်ကြောင်း ထုတ်ပြန်ထားသည်။
