
APM ၊ ဧပြီ ၁ / ၂၀၂၃
အမေရိကန်နိုင်ငံတောင်ပိုင်းနန့် အနောက်အလယ်ပိုင်းဒေသများဖြစ်သည့် အာကန်ဆော၊ အီလီနွိုက်စ်နန့် အင်ဒီ ယားနား ပြည်နယ်ရို့တွင် မာ့ချ် ၃၁ ရက်နိက လီဆင်နှာမောင်းဝင်ရောက် တိုက်ခတ်မှုကြောင့် လူ ၆ ယောက်ထက်မနည်း သီဆုံးခ ကြောင်း သိရသည်။
လီဆင်နှာမောင်း တိုက်ခတ်မှုကြောင့် အာကန်ဆောပြည်နယ်၊ Little Rock မြို့တွင် လူ ၁ ယောက်သီဆုံးခပြီး၊ Wynne မြို့တွင် လူ ၂ ယောက်သီဆုံးခကြောင်း ပြည်နယ်အစိုးရက ကြေညာထားသည်။
လီဆင်နှာမောင်းတိုက်ခတ်မှုအတွင်း အာကန်ဆောပြည်နယ်၊ Little Rock မြို့တွင် အနည်းဆုံးလူ ၃၀ခန့် ထိခိုက် ဒဏ်ရာ ရဟိခပြီး၊ အိမ်ခြီ ၂၀၀၀ကျော် ပျက်စီးခကြောင်း မြို့တော်ဝန် ဖရန့်စကော့ (Frank Scott) က ပြောကြားသည်။
အီလီနွိုက်စ်ပြည်နယ်ဟိ ပြဇာတ်ရုံတခုတွင် လီဆင်နှာမောင်းတိုက်ခတ်မှုအတွင်း ခေါင်မိုးပြိုကျမှုကြောင့် လူ ၁ ယောက် သီဆုံးကာ၊ ၂၈ ယောက်ထက်မနည်း ထိခိုက်ဒဏ်ရာရဟိခကြောင်း အခင်းဖြစ်ရာနီရာတွင် ဟိနီသည့် သတင်းထောက် များအား မီးသတ်အရာဟိတဦးက ပြောဆိုခသည်။
အင်ဒီယားနားပြည်နယ်ဟိ ဆူလဗန်ကောင်တီတွင်လေ့ လီဆင်နှာမောင်းတိုက်ခတ်ပြီးနောက် လူ ၂ ယောက် သီဆုံး ခပြီး၊ ၆ ယောက် ထိခိုက်ဒဏ်ရာရဟိခကြောင်း ပြည်နယ်ရဲတပ်ဖွဲ့က ထုတ်ပြန်ထားသည်။
လက်ဟိတွင် လီဆင်နှာမောင်းတိုက်ခတ်မှုကြောင့် လမ်းမီးတိုင်များလဲကျရာမှ ဒေသတချို့၌ လျှပ်စစ်မီး ပြတ် တောက်နီပြီး၊ သီဆုံးသူအရေအတွက်မှာ တိုးလာနိုင်ကြောင်း အာကန်ဆောပြည်နယ်အစိုးရက သတင်းစာယှင်း လင်းပွဲ၌ ပြောဆိုထား သည်။
ပြီးခသည့် အပတ်ကလေ့ အမေရိကန်နိုင်ငံ၊ မစ္စစ္စပီပြည်နယ်တွင် မုန်တိုင်းနန့် လီဆင်နှာမောင်းတိုက်ခတ်မှုအတွင်း အနည်း ဆုံး လူ ၂၆ ယောက် သီဆုံးခကြောင်း သိဟိရသည်။
Source – Storms Kill at Least 6 as Tornadoes Tear Through Midwest and South
Photo – AP

