APM ၊ ဂျန်နဝါရီ ၁၂ / ၂၀၂၂
ရသေ့တောင်မြို့သို့ ကုန်စည်စီးဆင်းရာ တခုတည်းသော ကုန်းလမ်းလေ့ဖြစ်၊ ဒေသခံပြည်သူ များအဓိက အသုံးပြု လားလာနီကတ်ရသည့် မြို့ချင်းဆက် လမ်းတခုလေ့ဖြစ်သည့် ပုဏ္ဏားကျွန်း-ရသေ့တောင် ကားလမ်းကို လက်ဟိ အချိန်ထိ မြန်မာစစ်တပ်က ဆက်ပိတ်ထား၍ ဒေသခံပြည်သူများ ဒုက္ခရောက်နီကြောင်း သိရသည်။
ပုဏ္ဏားကျွန်း-ရသေ့တောင် ကားလမ်းကို ကုန်ခသည့် ဂျုန် ၁၆ ရက်နိမှစ၍ ကားလမ်းတလျှောက် စစ်ဆီးရီးဂိတ် သုံးခုဖွင့်ကာ မြန်မာစစ်တပ်က တင်းတင်းကျပ်ကျပ် ပိတ်ဆို့ထားသည်။
လက်ဟိတွင် ရက္ခိုင့်တပ်တော် AA နန့် မြန်မာစစ်တပ်ရို့ အပစ်အခတ်ရပ်တန့်ထားသည်မှာ ၁ လကျော် ကြာမြင့် လာကေလေ့ ယင်း ပုဏ္ဏားကျွန်း-ရသေ့တောင် ကြားလမ်းကို မြန်မာစစ်တပ်ဖက်က ပြန်မဖွင့်ပီးဘဲ ဆက်လက် ပိတ်ဆို့ထား၍ ရသေ့တောင်မြို့သို့ ကုန်စည်ပို့ဆောင်ရီးနန့် လားလာရီး အခက်အခဲဖြစ်နီ ကတ်ရသည်။
ယင်းအပြင် ယင်းသို့လမ်းပိတ်ထားမှုကြောင့် ယင်းလမ်းကို အဓိက အားထားနီကတ်ရသည့် ပုဏ္ဏားကျွန်းမြို့နယ် တောဖျားချောင်းဒေသမှ ပြည်သူများမှာ အရေးပေါ်ကျန်းမာရီးကိစ္စများ၌ အချိန်ကြန့်ကြာပြီး ဒုက္ခရောက်နီကတ် ရသည်။
အလားတူ ယင်း ပုဏ္ဏားကျွန်း-ရသေ့တောင် ကားလမ်းကို ဆက်လက်လမ်းပိတ်ထား၍ အဆိုပါလမ်း၌ ဗြီးဆွဲနီကတ် သည့်ကားသမားများမှာလေ့ ကားများ ရပ်နားထားရကာ စားဝတ်နီရီး အခက်ကြုံနီကတ်ရကြောင်း သိရသည်။
